स्वातंत्र्य लढ्याच्या काळात ०७ ऑगस्ट १९०५ रोजी स्वदेशी चळवळ सुरू करण्यात आली. या चळवळीमुळे स्वदेशी उद्योगांना विशेषतः हातमाग विणकरांना मोठा आधार मिळाला होता. या ऐतिहासिक चळवळीचे स्मरण म्हणून दरवर्षी ७ ऑगस्ट हा दिवस 'राष्ट्रीय हातमाग दिन' (विणकर दिवस) म्हणून साजरा करण्याचा महत्त्वपूर्ण निर्णय २०१५ साली भारताचे पंतप्रधान मा. श्री. नरेंद्र मोदी यांच्या नेतृत्वाखालील सरकारने घेतला.

विणकरांसाठी केंद्र व राज्य सरकारने हाती घेतलेल्या विविध कल्याणकारी योजना व उपक्रमांची माहिती देऊन त्यांच्यामध्ये जनजागृती निर्माण करणे हा या कार्यक्रमाचा मुख्य उद्देश आहे. देशातील हातमाग विणकर समुदायाप्रती आदर व सन्मान व्यक्त करणे, त्यांच्या अप्रतिम कलाकौशल्याचा गौरव करणे आणि भारताच्या सामाजिक व आर्थिक विकासात या क्षेत्राच्या अमूल्य योगदानाची यथोचित दखल घेणे हा या दिवसाचा मूळ हेतू आहे.